Պատասխան Երևանի քաղաքապետարանից

«Հանրային ծառայության մասին» օրենքի (այսուհետ՝ Օրենք) 5-րդ հոդվածի 1-ին մասի համաձայն՝ քաղաքական պաշտոնը Հայաստանի Հանրապետության Սահմանադրությամբ և օրենքներով նախատեսված ընտրովի կամ նշանակովի պաշտոն է, որն զբաղեցնող անձն օժտված է քաղաքական որոշումներ կայացնելու իրավասությամբ և քաղաքական պատասխանատվություն է կրում այդ որոշումների համար:

Նույն հոդվածի 3-րդ մասի համաձայն՝ համայնքային քաղաքական պաշտոններն են համայնքների ղեկավարների և նրանց տեղակալների, համայնքի ավագանու անդամի պաշտոնները:

Օրենքի 19-րդ հոդվածի 1-ին մասի 3-րդ կետի համաձայն՝ հանրային ծառայողի հիմնական պարտականություններից է հանրային ծառայողի վարքագծի սկզբունքներին և դրանից բխող վարքագծի կանոններին, անհամատեղելիության պահանջներին, այլ սահմանափակումներին և շահերի բախմանն առնչվող կարգավորումներին հետևելը:

Օրենքի կարգավորումների համաձայն՝ հանրային ծառայության սկզբունքներից է, ի թիվս այլնի, վարքագծի սկզբունքները, բարեկրթությունը և հարգալիրությունը:

Օրենքի 28-րդ հոդվածի 9-րդ մասի համաձայն՝ վարքագծի կանոնների խախտումը կարող է առաջացնել կարգապահական պատասխանատվություն: Կարգապահական պատասխանատվության վերաբերյալ դրույթները կիրառելի չեն քաղաքական պաշտոն զբաղեցնող անձանց նկատմամբ:

«Երևան քաղաքում տեղական ինքնակառավարման մասին» օրենքի 21-րդ հոդվածի 4-րդ մասի համաձայն՝ ավագանու անդամը իր լիազորությունների իրականացման ընթացքում և դրանից հետո չի կարող հետապնդվել և պատասխանատվության ենթարկվել ավագանու՝ իր կարգավիճակից բխող գործողությունների, ներառյալ՝ քվեարկության, ինչպես նաև ավագանիում հայտնած կարծիքի համար, եթե այն քրեորեն հետապնդելի արարք չէ:

Վերոգրյալ ներմերի վերլուծությունից հետևում է, որ ավագանու անդամի պաշտոնը քաղաքական պաշտոն է, որի կողմից վարքագծի կանոնների խախտում թույլ տալու դեպքում կարգապահական պատասխանատվության ենթարկելու իրավական հիմք օրենսդրությամբ նախատեսված չէ։